Simpang Rimba, Bekaespedia.com_ kalau lah ngumong masalah antu, kate kawan langsung rijit bulu isik. Ape agik name-name yang disebut ade sangkut paut e dengan pengalaman masa kecit duluk, dimane saat itu wo, ngah, ayah ken mak, kakak, adik ataupun kawan kite nakot-nakoti kite ken bende itu.
Berikut ni name-name Antu yang di kenal dan hati disebut di masyarakat Bangka:
1. Kindai dan Bukang
Antu ni ade orang nyebut e kindai dan di wilayah kecamatan Simpang Rimba biase di sebut Bukang. Kindai atau Bukang dipercaye orang pacak menyerupai segale macem binatang. Dari binatang yang kecit sampai yang besak. Cuntoh e menyerupai tupai. Kate orangtue duluk, kalau antu ni menyerupai tupai, kite agik pacak melawan e. Dan kite hanye boleh melukai die sekali, walaupun Bukang tetep nyerang kite. Kalau Bukang lah luke, berikut e kite jangan pakai bende tajem. Kalau yang kedue pakai bende tajem dan die teluke agik, die makin kuat dan kite dak pacak ngelawan e. Dan kalok die menyerupai binatang yang lebih besak dari tupai, cepet-cepet kite menghindar, ambik langkah seribu. Lemer kite di lanyek e.
Kesukaan Bukang atau Kindai ne ngisep darah orang. Tapi die hanye ne’ ngisep darah manusii di malem ari, siang nya nggak. Bahkan die dak berani menampakkan diri e disiang hari
2. Mate Anak
Mate anak, ade uge yang nyebut e dengan kuntilanak. Mungkin ade uge name versi lain e. Mate Anak ni, Kate Abok dan urang tue kami duluk e seneng dengan orang laki. Antu ni seneng e makan kemaluan orang laki. Tapi die takot ken orang bini. Ape agik kalok orang bini (maaf) bukak seluar, mancit nya lari. Suare Mate Anak ni ngeringek dan beraksi e malem-malem.
3. Mencadin, Menyadin, Bangkit,
Antu ini menurut kepercayaan orang-orang tue duluk e, manusio biase yang mati dak diterimak bumi. Kepercayaan orang duluk, Mencadin atau Menyadin atau Bangkit ni, die keluar dari kuburan e saat magrib. Di atas kubur e muncul asep alus secara perlahan dan kemudian sedikit demi sedikit memberubah bentuk menjadi pocong. Bangkit ini akan selalu muncul dan gentayangan sampai malem ke tujuh kematian e. Die gentayangan ne’ mintak tulong dengan orang. Tapi walau minta tulong, orang ge ketakot ketemu kek nya. Kalau di kejer mencadin atau bangkit ni, kite harus lari melewati aik (sungai). Kalau dak lewati sungai sejauh apepon tetep dikejer e,
4. Antu Kuyang
Sesuai dengan name e, Antu sikok ni idup e di kayu-kayu tue yang ade Kuyang.
Dipercayekan orang-orang tue duluk, Kuyang ni maken manusio yang senang naek kayu yang ade kuyang e. Kalau orang e bekanti pegi ke utan dan sikok naek kayu yang ade kuyang, Tanpa di ketahui orang yang naek itu di makan Kuyang, dan walau yang di makan lah mati, tapi Kuyang itu suare e pacak macem suare orang yang dimakan e itu supaya orang yang di bawah naek nyusul kawan yang naek itu.
5. Antu Burok Punggung
Antu jenis ini idup e berbergentayangan. Biase e pakaian e puteh-puteh, tapi ade uge yang warna merah (jenis ni biase e kadang ketempoh kek orang di atas batang durin). Dipercaye Orang walau nampak bagus di adep, tapi punggung e burok berulet. Maka di sebut orang Antu Burok Punggung. Orang luar Bangkak nyebut e Sundel Bolong. Kalau Sundel Bolong liat orang ketabe dan ngikik teros, kalok Antu Burok Punggung terkesan diem, dak banyak bunyi.
6. Buyut
Antu Buyut idup di Aik / Aek. Dipercayai orang-orang tue, kalau ade yang tenggelem di aik, orang percaye orang yang tenggelem itu di tarek buyut, hingga orang dak pacak berenang dan akher e mati tenggelem.
7. Antu Berasuk
Orang-orang tue era 90an ke bawah seneng nyarik rusa, kijang, napoh dan pelanduk menggunakan jaring yang dibuat sedemikian rupe dan di sebut lapon. Untuk nangkep binatang itu biase e bawa asok hingga belasan ikok. Maka gawe ngakal binatang ni di sebut belapon atau berasuk. Kadang mereka pegi ngandun nian ke tempet yang cukup jauh. Maklum saat itu lom ade kendaraan bermotor. Bahkan kerito angen ge lom ade seperti sekarang. Jadi orang-orang tu nginep di utan di mane orangtu pegi belapon.
Nah, dipercayakan orang tue duluk, saking jauh e orang pegi berasuk hingga ade yang terseset dan dak pacak agik pulang. Dan dipercaye kan orang, lame lame yang seset ini lah jadi antu, disebutlah Antu Berasuk. Kalau duluk di saat bulan 14, 15, 16, 17 hingga bulan meredup sekiter 20an ari bulan, ade yang nugak asok dan seperti ade yang belapon tapi dakde orang e, maka disebut Antu Berasok.
8. Nek Gergasi,
Nek Gergasi, dikisahkan beraksi sekiter jam 4 pagi sampai ari puang timor (pagi menjelang). Nek Gergasi gawe e ne’ ngambik atau nyulik budak kecit. Dipercaye kan orang tue duluk, kalau ade suare seperti orang menggoreng sesuatu di pagi-pagi ari tu, itulah suare Nek Gergasi.
9. Mawang
Nyebut name Antu sikok ni umum e orang Bangkak takot. Saking takot e nyebut ge bebisik. Antu ni dipercaye antu yang paling serem, kejem dan sadis. Kalok nya ketemu orang dan orang ngeliat muke e, langsong nya tangkep dan di kantet e, dan langsung di makan e, serem kan…
Gambaran muke e serem dengan gigi panjang ngeraeng, kuku tajem cem pisau raot.
Orang-orangtue duluk sangat pecaye Mawang ni Bilung e tajem, pacak denger orang yang nyebut name die.
Dak pacak di ungkapkan dengan detail cemane Antu Mawang i ni muke e. Ade yang madah muke sebelah kanan bagus, sebelah kirek jiat. Tapi dak tau uge cemane sesungguh e.
Beberape bulan yang lalu Mawang ni di angkat ke layar lebar oleh sineas Bangkak Belitung, yakni Mawang : Jangan sebut name e. Dan kebetulan Abok Amang ge dapet peran sebagai pemilik Mawang e, walau maen e hanye sekilas, hehehehe…
Mawang ni menurut kisah orangtue duluk e merupakan raje dari segale raje Antu di Bangkak
Nah, itulah beberape name Antu atau hantu setau Abok Amang. Mungkin agik ade name-name Antu lain yang lom disebut atau Amang dak tau. Yang bace tulisan ni tulong berik komentar ok.
Ngomong-ngomong untuk menghindari ketemu dengan Antu-antu itu, orang tue duluk selalu membekali anak-anak e dengan jampik-jampik sesuai dengan name-name Antu tersebut. Dan kate-kate yang gati di denger apabila orang keliwat bates dalam segale hal, disebut Berantu.
Allahu A’lam Bissawwab.
