Oleh : Abok Amang
Simpang Rimba, Bekaespedia.com _ Entah ape name penyakit bilung benanah bahasa kampong ikak? Kalok kampong kami nyebut e curek, Ade uge yang nyebut e cungek, mungkin agik ade istilah lain e.
Curek ni sebutan lain penyakit bilung (telinga) atau kuping benanah yang duluk e gati nyerang budak kecit yang beumor diatas 2 tahun lebeh dan di bawah 23 taon.
Men lah kene penyaket ni, jangankan yang kene, yang dak kene ge dak kawa deket budak tu. Mambu e jangan ditanyak, hanye sekiter 5 miter agik kemambu. Bahasa kami e bererong. Pukok e cobaan iduplah men kene penyaket curek ni. Tapi dak tau ngape lah name ge penyaket.
Nah, di kampong kami sukorlah sangat jarang ade kene penyaket ni. Selain duluk memang banyek dukon, tapi ade ubat tradisional yang selalu digunekan orang tue kalok anak e lah ade tanda-tanda awal saket curex ni, mak budak langsong ngambik buah tanaman ni.
Ni ku berik tau ok,
Kalok di kampong kami name batang ni di sebut batang Ipo-ipo, ade uge yang nyebut e Kala Juntai. Kalok di kampong ikak mungkin lain agik. Entah ape bahasa Indonesia, e. Tapi pas di carik di google name e Dianella Tasmanica. Entah ape name bahasa Latin e
Buah e ijau, kalok lah masak warna ungu. Nah, buah e yang lah masak ni rutin di tites di bilung yang kene Curex atau benanah tu. Nites e pas sude mandik pagi, sude mandi siang dan mandik sure. Sambil dibersehkan nanah yang di bilung itu. Eh, jangan lupak uge bilung budak sebelum tiduk malem di berseh agik, dan di tites agik gen buah Ipo-Ipo, Harus rutin ok. Dan kalok rutin yakenlah pasti baras alias semboh.
Lah tau kan gune batang Ipo-ipo ?. Semoga bermanfaat dan begune ok tulisan ngeracau ni, tapi khasiat batang Ipo-ipo dak ngeracau. Jangan lupak padeh kek orang.
Kelak Abok Amang carek agik dan madah agik manfaat tumbo-tumbo lain e. Abok Amang nanyak luk kek orang-orang tue. (Koes549l
