Oleh : Abok Amang
Simpang Rimba, Bekaespedia.com _ karena duluk e kite lah biase idup di utan, jadi untok ubat-ubatan tradisional lah jadi biase uge pas balak kene dirik.
‘Ade Saket Ade Ubat, yang dak pacak dijadi ubat tu batang sikok akar sikok”‘, cemtu orang tue duluk gati becakap. Arti e segale yang ade di sekeliling kite maksod e pacak semue dijadikan ubat, kecuali batang sikok akar sikok. Nah, kate Batang Sikok Akar Sikok ni sampai sekarang Amang dak paham. Mungkin seperadik ade yang paham maksod e ? Men paham padah-padah ok kek Amang…
Kalok yang ne’ Abok Amang Kisah ni ukan batang ukan akar, tapi aik madu yang gati di jadikan untok ubat dan selalu disimpen di umah, di pundok kebon dan di pundok ume.
Abok Usang, Abok Amang, Amang, Anjang, Ngah, Cik, Busu dan termasok orang tue kite, Aik Madu selalu di simpen di butol beling dan disimpen di atas pare, atau di sinto umah atau pundok kebon atau pundok Ume. Dan warna e kadang lah item legem. Ikak suah dak nanyak aik Madu ape yang disimpen, ternyata biase e yang disimpen tu Aik Madu Pelawan (jangan samapai dibace Aik Madu Perawan ok,)
Aik Madu pelawan ni, Kate Abok kami luk e, musem e hanye setaon sekali, saat ne’ musem kemarau. Dan kalok sunggau lah ngisi agak penoh, yang masang sunggau cepet-cepet pusong e. Hal e kalok keduluk ari ujan atau ujan rintek ge, aik Madu pelawan dan menjadi. Karena menurut orang-orang tu, kembang pelawan kepak e ngadep langet, jadi kalok ari ujan mudah di masok aik. Maka e musem Madu pelawan hanye ad setaon sekali saat musem panas.
Becakap-becakap lah panjang igak becakap Abok Amang ni. Langsong bae madah gune aik Madu dan care makai e,
Selain digunekan untok ubat dalem, aik Madu sangat ampuh digunekan untok ubat luar, terutama untok luke tebakar, melepoh kene sirem aik anget.
Care makai e, kalok tebakar atau kene api, cepet-cepet di puper atau di oles ken Aik Madu, paling bagus aik Madu pelawan. Jangan di siram ken aik ok, lagsung oles ken aik madu.
Selain kene api, kalok tesirem aik panas. Same lah care e. Langsung di puper atau di oles dengan aik madu.
Puper berulang-ulang ok, Insha Allah cepet baras atau semboh, dan dak meninggalkan bekas.
Selain tu, aik madu pacak untuk masker muke biar muke kinclong Kate budak sekarang. Kalok di ules ke rambut, untuk nutrisi rambut biar akar e kuat, juge agar rambut lambat beruban. Ade agik gune Madu di ules ke rambut biar kutu pacak bedem dan mati. Cube lah ikak cube.
Agik banyak gune e yang lain. Ni hanye sekedar untuk ubat luar, men ubat dalem sepradik seberuyot ikak pasti lebeh tau, hehehe.
Ngumong-ngumong men ade yang nek pesen madu, Abok Amang ade jual Madu manis, Insha Allah amanah dan selalu ade stock walau sedikit. Harge e pon terjangkau.
Men ade piker, ni nomor WA e : 08127244510,
Dan ternyata bener lah Kate orang-orang tue duluk, madu tu raje ubat. Karena di Al Qur’an Surah An-Nahl : 69,
“Dari perut lebah itu keluar minuman (madu) yang bermacam-macam warnanya, di dalamnya terdapat obat yang menyembuhkan bagi manusia”, QS. An-Nahl : 69)
Sebagai manusio yang beriman, dak usah ragu agik tentang manfaat madu sebagai ubat segale ubat. Kalok kite ragu manfaat madu berarti kite dak beriman, hehehehe.
Yo kite minom madu untok ubat,
Maaf ok, jangan tersinggung dengan begurau ala Abok Amang…
