Karya: Aridho (Siswa SMP Negeri 2 Toboali)
Di Pulau Bangka, di Kampung Batu Perahu, ade berik bename Jep. Jep ni berik yang rajen dalam idop e. Die maju nulong ayah e yang jadi nelayan di kampong to. Men tengah libor, Jep ne pasti gi ke laot ken ayah e. Ayah e lah lame jadi nelayan, neruske gawe ayah e uge dulok to. Keluargo Jep ne dak telalu lah berade. Tapi mun tok makan adelah hiket-hiket. Jep ne kadeng-kadeng diulok oleh kanti e yang laen. Segeh isek Jep ne item macem dak mandik beari-ari. Die dak hangat ngerawat badan e, macem to uge ayah ken mak e. Mak e uge biase begawe nulong urang laen muet belacan.
Bukan Cuma isek e item bai Jep ni nue diulok kanti e. Tapi, ade uge kadang kanti e ngulok Jep ne dak hangat pintar. Jep kadang e bejik tapi die nahan bai segeh die takot ken kawan e. Jep uge dak hua nyerita ken mak ayah e. Biase e die men dak lagi nulong ayah e, die gi manceng. Biase die ne dapet ikan hemilang. Ade hikok ikan hemilang yang die peliharo di umah e. Hayang nian die ken ikan to, segeh ikan to bagoh warne e. Hendireklah die manceng, segeh kanti laen e dak nek ken die. Tapi die ne dak taken berenang, meski uma e deket laot die dak taken berenang dak.
Wakto to pas Jep tenga pulang hekula jalan kaki, die didateng berik bename Anas. Anas ne sekelaslah ken Jep, tapi die masok ke rombongan kanti yeng nue ngulok Jep.
“Jep ! Ka nek dak ngikot ku manceng pulang ne. Segeh ku dakde kanti laen e, kayak e ka lah yang nek. Kelak ku jadi kanti ka. Ku dakde dak macem kawan laen yang ngulok-ngulok ka,” kate Anas ngerayu Jep.
“Aok nian ken? Kelak ka ngebulakku,” kaye Jep dakde yakin.
“Peh dak lah. Ngape nian aku nek ngebulak ka,” kate Anas.
Jep yang biase e dak de kawanti, langsong nek wah diajak manceng oleh Anas. Rupe e Anas ne lah muet rencana ken kanti lain e yeng biase ngulok Jep. Anas ken kanti lain e nek bebuat jahat ken Jep. Hudeh nyampai umah, Jep ne langsong behalin bajok. Nue ingen e die diajak manceng oleh Anas. Dak taken die men Anas nek bebuat jahat ken die. Jep langsong ngambek panceng yang die beli pakai duet die hendirek. Jep ni rajen uge nabong. Men die dapet duet dari ayah e pas tengah banyak ikan, ditabong duet yang diberi ayah e tadi to.
Lah hampai ditempet manceng, ditingok e Anas lah ade dudok di atas batu besak.
“Nas, lah lame ka nungguku, ok,” tanyak Jep.
“Lom, barulah uge ku dateng e,” kate Anas.
“Banyak ne ku muik umpan e, ka ambek bai men nek,” kate Jep.
“Woohh, banyak uge ka muik. Aok kelak ku ambek,” kate Anas.
Jep dak taken bahwa Anas ne lah ngajak kanti lain e nek nyelakoi die. Kanti Anas yang laen ne lah hembunyik di belakang batu besak lain e deket urang to manceng. Pas lah lame dudok, lum adelah umpan dimaken ikan. Anas merik kode besiul-siul manggel kanti e laen. Diem-diem kanti e Anas bejalan di belakang urang due to. Pas lah di belakang Jep, langsong Jep ne ditulak ke laot. Jep yang dak taken berenang, langsong tenggelem. Ketabelah Anas ken kanti e ningok Jep lah tenggelem di aik laot.
Dak lame to, angen nue kenceng betiup. Ombak lot uge jadi besak. Pas urang to ningok ke arah Jep jatoh tadik, macem ade ikan yang nue lube e. Ikan to muncolke kepale e. Rupe-rupe e ikan to Ikan Hemilang besak. Hebesak umat to lah ikan to. Ikan to ngangket Jep dari aik laot teroh dibuik e ke atas batu. Kehaben Anas ken kanti e ningok Ikan Hemilang to pacak muik Jep. Muncol lah sinar terang dari mulot e ikan to teroh disembor ke Jep. Dak lame to Jep tesadar, idup pulik e. Rupe e Ikan Hemilang to ikan sakti penunggu laot to.
“Ikak hemue e ngapelah nek bebuat jahat ken kanti ikak,” kate Ikan Hemilang pacak becakap.
“Amm…amm…pooonnn! Kami dak hengajo dak ikan,” kate Anas nue kehaben e.
“Ikak agik kecet tapi lah pacak muet urang lain celako. Men ikak agik nue ngulok Jep atau kanti ikak laen e, ikak kelak kuubah jadi ikan uge, nek dak ikak?” ancam Ikan Hemilang.
“Dak…dak ken berani agik kami ngulok dengan nyelakoi urang. Kami bejanji ken ka ikan,” kate Anas dengan kanti lain e.
Hemenjak kejadian to, Anas dak nek agik ngulok Jep ken urang lain. Die lah bekanti nian kini e ken Jep. Teroh to Anas uge nggak agik kini manceng ke laot, die nue trauma e ningok Ikan Hemilang sakti to. (BP)*
